“ પ્રભુ “ તને રાધા ગમે કે ગમે મીરાં ?

“ પ્રભુ “ તને રાધા ગમે કે ગમે મીરાં ? 
પ્રભુ તને રાધા ગમે કે ગમે મીરાં… ?
એકે કાળજ કરવત મૂક્યાં
એકે પાડ્યા ચીરા… !
પ્રભુ તને રાધા ગમે કે ગમે મીરાં… ?
https://diludiary.blogspot.com

એકે જોબન ઘેલી થઇને તને નાચ નચાવ્યો ;
એકે જોબન ઘૂણી માથે તારો અલખ જગાવ્યો
એકે તને ગોરસ પાયાં
એકે ઝેર કટોરા… !
પ્રભુ તને રાધા ગમે કે ગમે મીરાં… ?

પચરંગી પાનેતર તું વિણ રાધે કદી’ન પહેર્યો ;
મખમલિયો મલીર મીરાંનાં અંગે કદી’ન લહેર્યો
એકે ઓઢી શ્યામ ઓઢણી
એક ભગવા લીરા… !
પ્રભુ તને રાધા ગમે કે ગમે મીરાં… ?

મલક બધાનો મૂકી મલાજો રાધા બની વરણાગણ
ભર્યો ભાદર્યો મૂકી મેડતો મીરાં બની વેરાગણ
એક નેણની દર્દ દીવાની
બીજી શબ્દ શરીરા… !
પ્રભુ તને રાધા ગમે કે ગમે મીરાં… ?
https://diludiary.blogspot.com/

હું પ્રભુ છું પૂછો એટલું મળે ક્યાંય જો રાધા…
મળે ક્યાંય તો પૂછો મીરાંને કોને વહાલો માધા… ?
મારે અંતર રાધા વેણુ વગાડે
ભીતર મીરાં મંજીરા… !
મારે તો મીરાં-રાધા-મીરા… !
પ્રભુ તને રાધા ગમે કે ગમે મીરાં… !