પહેલા ફોરામા ભીંજાણી,વાતું વાયુમાં વિંજાણી

પહેલા ફોરામા ભીંજાણી
   વાતું વાયુમાં વિંજાણી ,
ઓલી વાદલડી હરખાણી
   પ્રીત્યું પ્રીતમની પરખાણી ,
     ઈ તો મેહુલિયો.....
     આ તો મેહુલિયો.....

કાંઠે કાંઠે વહેતી વહેતી ,
નજરું બાંધી અમે સમેટી ,
ઝબકી વીજળી પણ શરમાણી
   ઉંચે આભે જઈ પથરાણી..
     ઈ તો મેહુલિયો.....
     આ તો મેહુલિયો.....

ચમકે પાલવનો ચમકારો ,
ઘમકે ઘૂઘરી નો ઘમકારો ,
મનમાં મોતીડે રંગાણી
    અડધી રાતે ઈ સમજાણી..
    ઈ તો મેહુલિયો.....
     આ તો મેહુલિયો.....

સૂરજ ઊગ્યો આજે વહેલો ,
આવ્યો તેજ લિસોટો પહેલો ,
અડધી રાતે હું મુંઝાણી
    વેણું નાદે હું બાંધણી...
    ઈ તો મેહુલિયો.....
     આ તો મેહુલિયો.....

    --- હર્ષિદા દીપક